Ջրային կոմիտեի նախագահ Արամազդ Ղալամքարյանն օրեր առաջ Արարատի մարզ այցի շրջանակում գտնվել էր Մասիս քաղաքի Կայարան թաղամասում, որտեղ առկա է տարիներ շարունակ չլուծված կոյուղատար համակարգի խնդիր։

Ղալամքարյանը «Երեւան» ՋՕԸ-ի տնօրեն Սերոբ Հարությունյանի հետ տեղում հանդիպել էր բնակիչներին և համայնքի ավագանու անդամներին, լսել նրանց մտահոգությունները, շրջել թաղամասում, ինչպես նաև խնդրից տուժած դպրոցի ու հարակից շենքերի տարածքներում։

Խնդրի հրատապ լուծումն ապահովելու նպատակով Կոմիտեի նախագահն այսօր հանդիպում-քննարկում ունեցավ Արարատի մարզպետ Սեդրակ Թևոնյանի, մարզպետի աշխատակազմի ներկայացուցիչների, Վեդու համայնքի ղեկավար Գարիկ Սարգսյանի, «Մելիորացիա» ՓԲԸ-ի գլխավոր տնօրեն Սասուն Միրոյանի, «Վեոլիա ջուր» ՓԲԸ-ի տեղամասի պետ Սարգիս Թորոսյանի և Մասիսի համայնքապետարանի պատասխանատու անձանց հետ։

Քննարկվեցին եւ դիտարկվեցին խնդրի լուծման մի քանի տարբերակներ։

Որոշում կայացվեց, որ նպատակահարմար է նախ հրատապ եւ միջնաժամկետ լուծում տալ եւ տարածքը մաքրել կոյուղաջրից, այնուհետեւ պլանավորել հիմնավոր եւ երկարաժամկետ լուծման սկզբնական քայլերը։